Paytaxt sakini Faiq Abbasovun adına şirkət açılıb, onun külli miqdarda vergi borcu yaranıb. Bu haqda bu gün, 21 oktyabr tarixində Bakuplus.az Xəzər Xəbər-ə istinadən məlumat verir.
Vətəndaşın sözlərinə görə, 5 il əvvəl naməlum şəxslər tərəfindən şirkət yaradılsa da, o, bu barədə 2 il öncə xəbər tutub. Kişi bu məsələ ilə bağlı müraciətlərinin nəticəsiz qaldığını bildirib. Hazırda onun 45.000 manata yaxın vergi borcu mövcuddur. Bu səbəbdən Abbasovun ölkədən çıxışına da qadağa qoyulub.
Dövlət Vergi Xidmətindən qeyd edilib ki, məsələ ilə bağlı vətəndaş Dövlət Vergi Xidmətinin xidmət mərkəzlərinə yaxınlaşaraq “ASAN İmza” ilə bağlı əməliyyatları dayandırmalıdır, daha sonra hüquq-mühafizə orqanlarına müraciət etməlidir.
Qurumdan bildiriblər ki, bu, vətəndaşı məsuliyyətdən tam azad etmir, lakin dələduzluğu törədənlər istintaq hərəkətləri və araşdırmalar çərçivəsində müəyyən ediləcək.
