Bakı-Sumqayıt yolunda digər nəqliyyat vasitələri avtobus zolağına məhəl qoymurlar. Bu haqda bu gün 26 yanvar tarixində Bakuplus.az İctimai TV-yə istinadən xəbər verir.
Bakı-Sumqayıt yolunda bir çox avtomobillər, taksi və moped sürücüləri avtobus zolaqlarının tələblərinə əməl etmir. Bu səbəbdən də ictimai nəqliyyat üçün bir dəyişiklik olmur.
Avtobus sürücülərinin sözlərinə görə, əsas problemləri “manatlıq” taksilər və şəxsi avtomobillərin sürücüləri yaradırlar.
“Biz heç bir fərq görmürük və yenə də tıxacda qalırıq. Zolağa daxil olanlar üçün cərimə artırılsa, daha effektiv olar. 40 manat yox, 200 manat olsa, yaxşı olar”, – deyə sürücülər bildirirlər.
Baş Dövlət Yol Polis İdarəsinin (BDYPİ) inspektoru Elvin Hacıyevin sözlərinə görə, yol hərəkəti haqqında qanuna əsasən, həmin zolaqlar sərnişindaşımalar üçün nəzərdə tutulub. Digər nəqliyyat vasitələri ancaq döngə əməliyyatı keçirən zaman zolağa daxil ola bilərlər.
