Bakı məktəblərində “Aşıq Ələsgər və Azərbaycan folkloru” mövzusunda yaradıcılıq müsabiqəsi keçiriləcək. Bu barədə Bakı Şəhəri üzrə Təhsil İdarəsi xəbər verib.
Bakı Şəhəri üzrə Təhsil İdarəsi tərəfindən təşkil olunan müsabiqə 1-25 noyabr tarixlərində VII-X sinif şagirdləri arasında təşkil olunacaq.
Məqsəd məktəbliləri Aşıq Ələsgərin həyat və yaradıcılığı, aşıq sənəti ilə daha yaxından tanış etmək, istedatlı şagirdləri üzə çıxartmaq, onlara yaradıcılıq həyatında təkan verməkdir.
Müsabiqə iki mərhələli olacaq:
- I mərhələsi (məktəb mərhələsi) 1 noyabr 2021-ci il tarixinədək davam edəcək. Məktəb mərhələsində hər məktəbdən nominasiyalar üzrə ən yaxşı şeir, mahnı ifaçıları və yaradıcı iş müəllifləri seçilərək onlar barədə məlumat ils.layiheler@baku.edu.gov.az elektron ünvanına göndərilməlidir.
- 2–25 noyabr 2021-ci il tarixlərində keçiriləcək müsabiqənin II-şəhər mərhələsində Münsiflər heyəti tərəfindən qaliblər müəyyənləşdiriləcək.
İki mərhələdən ibarət müsabiqə “Şeir”, “Mahnı” və “Yaradıcı iş” olmaqla 3 nominasiya üzrə keçirilir. Müsabiqəyə iştirakçılar yalnız bir nominasiya üzrə qatıla bilər.
“Şeir” və “Mahnı” nominasiyaları üzrə qiymətləndirmə zamanı bunlar qiymətləndiriləcək:
- ifaçının səhnə mədəniyyəti
- təqdimetmə və vaxtın düzgün idarəolunması bacarıqları (3-5 dəq)
- nitqin aydınlığı
- səlisliyi və ifadəliliyi
- məzmuna uyğun jest və mimikalardan istifadə
“Yaradıcı iş” nominasiyası üzrə isə bunlar qiymətləndiriləcək:
- maraqlı ideya,
- fikri sərbəst ifadə etmək bacarığı,
- bədii təfəkkür,
- obrazlı düşüncə və ifadə tərzi,
- düzgün kompozisiya və ideyanın orijinallığı.
Hər bir meyar 5 balla qiymətləndiriləcək.
Qaliblərə BŞTİ tərəfindən diplom və hədiyyələr veriləcək, şagirdləri müsabiqəyə hazırlaşdıran müəllimlər isə “Tərifnamə” ilə təltif ediləcək.
