Sabunçu rayonu, Bakıxanov qəsəbəsi, Fikrət Tağıyev küçəsində yerləşən park baxımsız vəziyyətdədir. Bu haqda bu gün, 13 iyul tarixində Bakuplus.az ATV-yə istinadən xəbər verir.
Sakinlərin sözlərinə görə, “Pionerlər Parkı” adlanan ərazi illərdir baxımsız vəziyyətdədir. Buradakı infrastruktur dağılmış haldadır.
“20 ildir park bu vəziyyətdədir. Heç kim buna baxmır. Biz, uşaqlarımız necə dincələk?! İstəyərdik ki, oturacaqlar, uşaq meydançaları olsun”, – deyə sakinlər bildirirlər.
Bakıxanov qəsəbəsi nümayəndəsi Rahim Budaqov məsələ ilə bağlı bildirib ki, sözügedən ərazi Elm və Təhsil Nazirliyinin balansındadır. Buna baxmayaraq, ərazi dəfələrlə təmizlənib və müvafiq orqanlara müraciət olunub.
Nazirlikdən isə qeyd olunub ki, sözügedən ərazidə yerləşən bina keçmiş 47 nömrəli məktəbdənkənar tərbiyə işi mərkəzi olub. Həmin binanın yenidən tikilməsi nəzərdə tutulub.
