Qoşaqışlaq adlanan kənd paytaxtın Xəzər rayonu Zirə qəsəbəsi ərazisində yerləşir. Kəndin ikinci adı Aşağı Qışlaqdır. Həmin ərazidə eramızdan əvvəl 3-2 minilliklərə aid olan kurqanlar və mağaralar var. Kəndin sakinləri tağ evlərdə yaşayırlar. Əsas məşğuliyyəti maldarlıq olan sakinlər öz bələdiyyəsinin olmadığını iddia edirlər. Real TV bu haqda reportaj hazırlayıb.
Kənddə bələdiyyə və icra hakimiyyəti olmadığına görə telefon və internet xətti də mövcud deyil. Küçələrdə asfaltlanma və işıqlandırılma işləri aparılmır.
Təxminən 500 nəfər əhalisi olan kənddə ümumilikdə 35-dən çox tağ ev var. Sakinlər bir-birinə qohum olduqlarından, mümkün dərəcədə bir-birinə köməklik göstərirlər.
Araşdırma zamanı məlum olub ki, bu kənd Zirə qəsəbəsi bələdiyyəsinin tabeliyindədir. Bələdiyyə sədri QoşaQışlaq kəndinin bərpası üçün bir sıra işlərin görüldüyünü bildirib və sakinlərin problemlərinin həll edilməsi üçün müvafiq tədbirlərin görüləcəyini də əlavə edib.
Onun sözlərinə görə, 2019 cu ildə sözügedən ərazidə su problemi tam olaraq aradan qaldırılıb. Zirə qəsəbəsində 40 yerlik uşaq bağçası tikilərək istifadəyə verilib. Hazırda telefon və internet xətlərinin çəkilməsi üzərində iş gedir. Yolların asfaltlanması ilə əlaqədar isə Xəzər RİH tərəfindən 1500 metr yol asfaltlanması üçün müraciət ünvanlanıb.
Mədəniyyət Nazirliyindən isə bildirilib ki, orada yerləşən tarixi evlərin bərpası üçün lazımi tədbirlər görüləcək. Sözügedən ərazidə monitorinqlər keçirilib və aşkar edilmiş tarixi evlər və abidələr qeydə alınaraq mühafizənin ilkin dərəcəsi tətbiq olunub.
