Bakı Zooloji Parkında qış mövsümünə hazırlıq başlayır. Bu haqda bu gün, 8 dekabr tarixində Bakuplus.az AzTV-yə istinadən məlumat verir.
Hazırlıq 2 mərhələdən ibarətdir. İlk mərhələ qida ilə bağlıdır - yay rasionundan fərqli olaraq, qışda heyvanlara 10-15 faiz daha çox qida verilir. Profilaktik tədbirlərə gəlincə soyuğa dözümlülüyü artırmaq üçün əlavə vitamin komplekslərindən istifadə edilir. Hava soyuduqdan sonra istiliyə ehtiyacı olan heyvalar qış üçün nəzərdə tutulan yuvalarına, qapalı məkanlara keçir.
Heyvanat Parkında Afrika və Asiyanın isti ölkələrindən olan heyvanlar və ekzotik quşlar var, hansılar ki isti sevir. Bunun üçün də qış aylarında bu heyvanlar ayrıca qulluq və qayğı tələb edir.
Bakı şəhər Heyvanat Parkının baş baytar həkimi Elvin Süleymanov: “Quş yuvaları altdan, yerdən və kənarlardan xüsusi isidici aparatlar vasitəsilə isidilir. Bizdə bəzi heyvanlar var ki, onlar xüsusən günəş şüasına ehtiyac duyan heyvanlardır. Onların günəş şüasına olan ehtiyacı ultrafiolet lapmalarla təmin olunur. Bu günəş şüaları tərəfindən orqanizimin D vitamininə olan ehtiyacı ödənilir”.
Əgər qış fəslində hava daha mülayim keçərsə, heyvanlar təmiz hava üçün gəzinti ərazilərinə buraxılır. Maraqlı məqamlardan biri də odur ki, zooparkda 3 qonur ayıdan ancaq biri qış yuxusuna gedir. Qış aylarında Bakıda havanın temperaturu çox aşağı olmadığından və ayılara il ərzində yem verildiyindən qış yuxusuna getmirlər. Heyvanat Parkında, həm də ölkəmizdə nəsli kəsilmə təhlükəsi olan heyvan növləri çoxaldılır, təbiətə, öz arealına qaytarılır.
Ümumilikdə, Bakı zooparkında 125 növ heyvan var. Onlardan 22-si Azərbaycanın “Qırmızı kitab”ına daxil edilib.
[URIS id=82287]
