Bakının Səbail rayonunda iritonnajlı avtomobillər sakinlərin narahatlığına səbəb olur. Bu haqda bu gün, 16 may tarixində Bakuplus.az Real TV-yə istinadən xəbər verir.
Bayıl qəsəbəsinin Bibiheybət küçəsi, döngə 2 ünvanında sakinlər gecə-gündüz evlərinin yanından keçən iritonnajlı avtomobillərdən şikayətçidirlər. Bu səbəbdən onlar gecələr nə yata, nə də dincələ bilirlər.
Ağır yük maşınları səbəbindən bəzi evlərin divarlarında çatlar əmələ gəlib. Yerlilər şəxsi maşınlarını park edə də bilmirlər.
“Biz buna görə heç pəncərələri aça bilmirik. Açan kimi ev toz-torpaqla dolur. Darvazanın qarşısından maşınlar keçir. Uşaqlarımızı güclə qoruyuruq. Onlara nəsə olsa, kim cavab verəcək?!” – deyə sakinlər şikayət edirlər.
Rayon İcra Hakimiyyətinin İnformasiya Təminatı və Təhlil Sektorunun müdiri Anar Hüseynov bildirib ki, sözügedən ünvanda olan problemdən xəbərdardırlar. Məsələ ilə bağlı müvafiq qurumlara müraciət ediləcək.
Bakı Şəhər Dövlət Yol Polisi İdarəsindən (BŞDYPİ) isə bildirilb ki, qeyd edilən ərazidə yol hərəkəti iştirakçılarının təhlükəsizliyinin təmin edilməsi məqsədilə polis əməkdaşları tərəfindən nəzarət tədbirləri keçirilir.
BŞDYPİ-nin bölmə rəisi Toğrul Nəsirlinin sözlərinə görə, ərazidə yük avtomobilləri üçün hərəkətini qadağan edən hər hansı nizamlanma vasitəsi yoxdur. Lakin yükdaşıma qaydalarını pozan sürücülər barəsində tədbirlər həyata keçirilir.
