Bakının Səbail rayonu, Bayıl qəsəbəsi, Qurban Abbasov küçəsi, 60 ünvanında yerləşən ikimərtəbəli bina qəzalı vəziyyətdədir. Bu haqda bu gün, 3 may tarixində Bakuplus.az Xəzər Xəbər-ə istinadən xəbər verir.
Sözügedən ərazidə yerləşən tikilinin 1 əsrdən çox yaşı var. Sakinlərin sözlərinə görə, onlara hər il vəd verilir ki, tikili söküləcək, lakin indiyə kimi məsələ həll olunmayıb. Eləcə də burada yaşamaq təhlükəlidir.
“Evdə oturduğumuz zaman yağış suyunun divarlardan aşağı axdığını görürük. 3 dəfə olub ki, yuxarıdan daşlar tökülüb. Bina çürük taxtalardan ibarətdir”, – deyə sakinlər şikayət edirlər.
Səbail rayon İcra Hakimiyyətindən bildirilib ki, binanın qəzalı vəziyyətdə olması barədə aidiyyəti qurumlara rəy göndərilib. Tikili qısa müddətdə mərhələli şəkildə söküləcək.
