Bakının Sabunçu rayonu, Bilgəh qəsəbəsində Şirvanşahlar dövründən qalan Bilgəh (Qız) qalası fərdi torpaq sahəsinin ortasında qalıb. Bu barədə tarixçi Şəhla Cabbarlı öz Facebook səhifəsində yazıb.
“Bir saat kənddə axtardıq, qalanın yerini bizə düzgün deyən olmadı, xəritə ilə də tapmaq olmurdu. Axırda bir kənd sakini, yaşlı dayı təəssüflə dedi ki, o qala şəxsi həyətdədir. Onun da sahibi qapısını bağlayıb, gedib, görə bilməyəcəksiniz. Gərək hansısa hasara, hündür yerə çıxasan ki, görə biləsən. Açıq deyil”, - deyə tarixçi yazıb.
Bununla yanaşı, qəsəbə ərazisində yerləşən orta əsrlərə aid hamam da şəxsi sahədə yerləşir.
Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətindən bildirilib ki, Bilgəh qəsəbəsində yerləşən Qala (XIV əsr) ölkə əhəmiyyətli tarix-memarlıq abidəsi kimi dövlət tərəfindən mühafizə olunan daşınmaz tarix-mədəniyyət abidələrinin reyestrinə daxildir.
“Həmin qalanın ətrafında 15-20 il öncə yaşayış evlərinin tikilməsi nəticəsində tarixi abidəyə gedən yol bağlanıb. Qala yaşayış evinin həyətyanı sahəsinə daxil edilib. Tarixi abidənin qorunmasına Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidməti tərəfindən nəzarət edilir. Həmin yaşayış evinin sahibi ilə tarixi abidənin qorunmasının vacibliyi barədə söhbətlər aparılıb”, - deyə qurumdan bildirilib.
Daha öncə Bakuplus.az komandası bu qala barədə məlumat verib. El arasında “Tonqal qalası” adlanan qədim tikili ölkə əhəmiyyətli abidələr siyahısına daxildir.
[caption id="attachment_117488" align="alignnone" width="640"]
Foto Şəhla Cabbarlının Facebook səhifəsi[/caption]
