Bakının Xəzər rayonu, Buzovna qəsəbəsində üç həftədən çoxdur ki, içməli su yoxdur. Bu haqda 23 iyun tarixində Oxu.az məlumat verib.
Yerli sakinin sözlərinə görə, Beynəlmiləl küçəsində yerləşən yaşayış binalarına suyun verilməsi dayandırılıb.
“Artıq 23 gündür ki, bizə su verilmir. Hər gün “qaynar xətt”ə zəng edirik, problemi bildiririk. Lakin operator bizə yalnız qəza olduğunu, qısa zamanda problemin aradan qaldırılacağını deyir. Bu qısa zaman 23 gündür ki, bitmək bilmir. Yay günü susuz qalmışıq, hamamlanmaq bir yana, içməyə su tapmırıq. Su maşınlarına hər dəfə 35-40 manat verib su almağa isə maddi imkanımız çatmır”, - deyə sakin bildirib.
Məsələ ilə bağlı “Azərsu” ASC-nin mətbuat xidmətindən məlumat verilib ki, sözügedən ünvanda suyun verilməsi gündəlik qrafik üzrə həyata keçirilir. Həmçinin qeyd olunub ki, şikayətçi ilə fərdi qaydada əlaqə saxlanılaraq məsələ araşdırılacaq.
