Bakının Xəzər rayonu, Buzovna qəsəbəsində qanunsuz ağaclar kəsilib. Bu haqda bu gün, 27 may tarixində Bakuplus.az ATV-yə istinadən xəbər verir.
Qəsəbənin Xətai küçəsində bir neçə nəfər 56 ağacı məhv edib. Daha sonra isə həyət evinə məxsus çəpərlər də dağıdılıb. Sakinlərin sözlərinə görə, kəsilən ağacları tullayaraq ərazidən gediblər.
“5-6 nəfər gəlib, yaşı 15-dən çox olan ağacları kökündən kəsiblər. Onlar deyiblər ki, ağaclar avtomobil sürücülərinə maneə yaradır”, – deyə sakinlər bildiriblər.
11 saylı regional Ekologiya və Təbii Sərvətlər İdarəsinin rəisi Qafar Ağayevin sözlərinə görə, toplanan məlumatlar hüquq-mühafizə orqanlarına göndəriləcək.
Xəzər rayonunun Buzovna qəsəbə ərazi dairəsi üzrə nümayəndəliyindən bildirildi ki, sözügedən ünvanda Emin adlı şəxs tərəfindən ümumi isifadədə olan yol qanunsuz zəbt olunub. Ərazi nəzarətə götürülüb və yaşıllıqların bərpa olunması istiqamətində işlər görülür.
