Paytaxtın Xəzər rayonu, Buzovna qəsəbəsi ərazisində məhəlləarası yolun ortasında təmir işləri barədə məlumat verən “Azərsu” ASC-yə məxsus lövhə ilə birgə müvəqqəti hasar quraşdırılsa da, həmin hasarın arxasında qanunsuz tikinti işləri aparılır. Bu haqda müvafiq şəkillər sosial şəbəkələrdə yayılıb.
Dünən, dekabrın 12-də çəkilmiş görüntüləri paylaşan internet istifadəçisinin verdiyi məlumata görə, yolu ayıran ərazidə daş hasar çəkilir və yol zəbt olunur.
“Azərsu” adından asılmış lövhə, şübhəsiz, insanları aldatmaq üçün bir vasitədir. Xəzər rayon İcra Hakimiyyəti, zəhmət olmasa, bu barədə bir açıqlama verin. Gediş-gəlişin azlığı və ya çoxluğundan asılı olmayaraq, yolun zəbt olunması yolverilməzdir!” – paylaşımda deyilir.
Bu gün, 13 dekabr tarixində sosial şəbəkələrdə yayılan məlumatdan sonra “Azərsu”nun işçiləri hadisə yerinə gəliblər. Onların baxışından sonra kommunal strukturun loqotipləri tikinti yerindən yoxa çıxıb. Bununla belə, qanunsuz fəaliyyətlər davam edir.
