Cavanşir yolötürücüsü hazırda təhlükə mənbəyinə çevrilib. Bu haqda bu gün, 9 may tarixində Bakuplus.az Report-a istinadən xəbər verir.
62 il öncə inşa olunan körpü həmin dövrün nəqliyyat axınına hesablanmışdı. Bu gün isə bu axın dəfələrlə çox olduğundan tikilinin konstruksiyasında problemlər yaranıb. Belə ki, körpünün dayaqlarında çatlama, dağılma və korroziya aşkarlanıb.
Azərbaycan Avtomobil Yolları Dövlət Agentliyindən (AAYDA) bildirilib ki, xaricdən 2 dəfə ekspertlər dəvət olunublar və baxış keçirilib. Nəticədə körpünün sökülməsinin məqsədəuyğun olduğu məlum olub, ancaq bununla bağlı hələ heç bir qərar verilməyib.
Sözügedən körpü 12 aşırımdan ibarətdir və ümumi uzunluğu 203, eni isə 17 metrdir. Əvvəllər körpünün altından qatarlar, üstündən isə avtomobillər hərəkət edib. Hazırda isə ərazidən keçən dəmir yolu xətləri sökülüb.
