Yaşayış binalarında tüstü bacalarının və havalandırma kanallarının vaxtında təmizlənməsi ən vacib məsələlərdən biridir. Əks halda mənzillərdə dəm qazından zəhərlənmə və boğulma halları tez-tez baş verə bilər. Bu haqda 28 dekabr tarixində AzTv reportaj yayıb.
Tüstü bacaları ilə əlaqədar sakinlər mənzil-kommunal istismar sahələrinə müraciət edə bilərlər. Müraciətdən sonra mənzil-kommunal istismar sahələri təmizlik işlərini aparan şirkətlə müqavilə bağlayır. Müqavilə əsasında həmin şirkətə ödəniş edilir və binaların bacaları təmizlənir.
Tüstü bacalarının vaxtında təmizlənməməsi bir sıra risklər də yaradır.
Dövlət yanğın nəzarəti xidmətinin rəis müavini Aqşin Kazımov: “Tüstü borularında yağ qalıqlarının yığışması bəzi hallarda yanğınla nəticələnir. Həm obyekt sahiblərinə, həm də geniş əhaliyə müraciət edirik ki, qaz sobalarının təmizlənməsi tələblərinin icrasına mütəmadi olaraq diqqət yetirsinlər”.
Qazdan təhlükəsiz istifadə qaydalarına görə, su qızdırıcılarının tüstü bacaları ildə 1 dəfə, digər qızdırıcı cihazların tüstü bacaları isə istilik mövsümündən əvvəl mütləq təmizlənməlidir.
[caption id="attachment_85160" align="alignnone" width="640"]
Foto AzTV-nin rəsmi Youtube kanalı[/caption]
