Tədris ilinin başlanması, şagirdlər və müəllimlər üçün yeni imkanlar, həyəcanlar və eyni zamanda müəyyən qaydalar gətirir. Hər il yeni dərs ilində şagird, tələbə və müəllim heyəti arasında təhsil müəssisələrində geyim qaydaları ilə bağlı məsələlər gündəmə gəlir. Ötən gün Tibb Universitetinin müəllimlərindən biri sosial şəbəkə hesabında tələbələrindən birinin geyimini müzakirə mövzusuna çevirib. İzləyicilərin bir qismi müəllimi tənqid edib və bildirilib ki, məktəblə universitet bir deyil. Bununla belə, rəylərdə müəllimi dəstəkləyənlər də olub.
Ali təhsil müəssisələri üçün xüsusi dress-kod olmalıdırmı?
İnsanoid.com mövzu ilə əlaqədar Milli Məclisin deputatı Ceyhun Məmmədovun fikirlərini soruşub. Millət vəkili qeyd edib ki, bəzi gənclər və tələbələr universitetə çimərlik geyimində, idman paltarında gedirlər:
“Bəzi tələbələr universitetə çılpaq gedirlər. Bu mövzu tez-tez müzakirə olunur. Universitet tələbəsi geyiminə diqqət yetirməlidir. Açıq-saçıq geyinməməlidir. Bəzən insanlar çimərlik paltarı ilə universitetə gedəndə geyinəcəyi geyimi səhv salır. Müəllimləri yox, tələbələri qınamalıyıq. Tələbələr bizim milli dəyərlərimizə diqqət etməlidirlər. Ötən gün baş verən hadisə ilə bağlı onu deyə bilərəm ki, müəllim sadəcə reaksiya verib. Vəziyyəti görüb, əsəbiləşib. Onu qınamaq, tənqid atəşinə tutmaq düzgün deyil. Belə tələbələr dərsi pozurlar. Ali məktəbdə oxuyan şəxs universitet tələbəsi olduğunu dərk etməlidir. Bu məsələlərə maksimum əməl etməlidirlər. Bu tip geyimlər dərs mühitini pozur və oğlanların psixologiyasına təsir göstərir”.
C.Məmmədov əlavə edib ki, media müəllimi yox, etik qaydalara əməl etməyən gəncləri qınamalıdır:
“Tələbə normal geyinməlidir. Çünki o uşaq deyil, formalaşmış şəxsdir. Soyunub getməməlidir”.
Təhsil eksperti Elçin Süleymanov bildirib ki, tələbələrin və müəllimlərin forma geyinməsi düzgün deyil:
“Universitet orta məktəb deyil. Tələbələrin və müəllimlərin forma geyinməsi düzgün deyil. Zaman-zaman mübahisələr ola bilər. Universitetlərdə baş örtüsü və saqqal məsələsi gündəmə gələ bilər. Amma tələbə və müəllimlərin geyimi sərbəst olmalıdır. Müəllimin bununla bağlı paylaşım etməsi düzgün deyil. Amma müəyyən mənada ona haqq da verirəm. Bəzən açıq-saçıq geyinənlərə rast gəlinir. Universitet mədəni mühitdir. Başqa insanların sərbəstliyinə mane olmamaq şərti ilə sərbəstlik olmalıdır. Xaricdə də geyim sərbəstdir. Amma Avropa ölkələrində tələbələr əyləncə geyimində universitetə getmirlər. Geyimə diqqət etməlidirlər. Açıq- saçıq geyimdə olmaz. Gecə yatmaq üçün nəzərdə tutulmuş geyimlə tədrisdə iştirak diqqət yayındıra bilər. Amma sərt dress-kod tətbiq etmək də olmaz”.
