Azərbaycanda tütün məmulatları tullantılarının ətraf mühitə atılmasına görə cərimənin məbləği kəskin artırılır. Bu məsələ İnzibati Xətalar Məcəlləsinə təklif olunan dəyişiklikdə öz əksini tapır. Məcəllənin 212-ci maddəsinə edilən dəyişikliklə tütün məmulatlarının açıq və qapalı ictimai yerlərdə istifadəsi ilə bağlı qaydalar daha da sərtləşdirilib, cərimələr artırılır.
Bu dəyişikliklərin tətbiqi və nəzarəti müxtəlif dövlət orqanlarının razılaşdırılması ilə həyata keçirilir. Dəyişikliyə əsasən, tütün məmulatları tullantılarının ətraf mühitə atılmasına görə cərimənin məbləği 50 manatdan 300 manata qaldırılır.
Bundan əlavə, nəzərdə tutulmuş xəta inzibati tənbeh almış şəxs tərəfindən inzibati tənbehvermə haqqında qərar qüvvəyə mindiyi gündən bir il ərzində təkrar törədildikdə həmin şəxs 700 manat məbləğində cərimə edilir, yaxud işin hallarına görə, xətanı törədənin şəxsiyyəti nəzərə alınmaqla, 60 saatdan 100 saatadək ictimai işlər tətbiq olunur.
BakuPlus.az-a məsələyə münasibət bildirən Milli Məclisin deputatı Aydın Hüseynovun sözlərinə görə, İnzibati Xətalar Məcəlləsinə edilən dəyişikliklərə bənzər tədbirlər bir çox ölkələrdə tətbiq edilir:
“Belə tədbirlər inzibati tənbeh kimi bir çox ölkələrdə tətbiq olunur. Bu dəyişikliklərin məqsədi ictimai asayişi və ətraf mühiti qorumaq, insanları tullantıların düzgün idarə olunması ilə bağlı məsuliyyətli davranmağa sövq etməkdir.
Xüsusilə, ətraf mühitin qorunmasına yönəlmiş ciddi cəza mexanizmləri ictimai yerlərdə zibilin atılmasının qarşısını almaq məqsədilə dünya üzrə qəbul edilən praktikalardan biridir”.
Millət vəkili qeyd edib ki, İnzibati Xətalar Məcəlləsinə edilən dəyişikliklər ekoloji mühitə dəyən zərərin azaldılması və insanların ətraf mühitlə bağlı davranış səviyyəsinin artırılması məqsədi daşıyır:
“Bu, inzibati tənbehdir və insanları mədəni davranışa cəlb etməyin mexanizmlərindən biridir. Bu, həm də siqaret çəkən bir çox insanı bu ziyanlı vərdişdən çəkindirə bilər”.
Nəzrin Vahid
