Harri Potter milyonlarla uşaq və böyüklər üçün möcüzəli canlılar və magiya ilə dolu fantaziya dünyasının qapısını açmağı bacaran ən məşhur sehrbazdır. Uşaqlıqda “sağ qalmış oğlan”ın yerində olmağı və sehrli çubuğa sahib olmağı hansımız arzulamamışıq?
Yeni il ərəfəsində Bakıda baş tutacaq tədbirlərdə sehr dünyası canlanacaq. Bakuplus.az komandası oxucularına Hoqvarts dünyasına həsr olunacaq və Yeni ilinizi sirlər və sehrlərlə dolduracaq tədbirlərin siyahısını təqdim edir.
Noyabrın 19-dan “Harri Potter” filmlərinin marafonu (Benedict Cafe)
“Benedict Cafe”də “Harri Potter” filmlərinin marafonu baş tutacaq. Noyabrın 19-dan etibarən ilin sonuna qədər hər bazar günü kafedə “Potteriana”nın bütün filmlərini izləmək mümkün olacaq. Əlavə olaraq film günündə tematik şirniyyatlar, hədiyyələr almaq və fotozonada şəkil çəkdirmək fürsəti olacaq.
Saat 19:00-da başlayacaq tədbirə biletin qiyməti 20 manatdır. Filmlərin nümayişi rus dilində olacaq. Biletləri və cədvəli “Benedict Cafe”dən əldə etmək olar.
Noyabrın 26-da “Hogwarts in Baku” (“Zenit Cafe&Bar”)
Noyabrın 26-da “Zenit Cafe&Bar”da “Hoqvarts”ı ziyarət etmək mümkün olacaq. Tədbirdə bölüşdürən papaq qonaqları fakültələrə ayıracaq, Rubeus Haqrid gələcək və ən əsası, Harri Potterlə görüş olacaq. Bundan əlavə DJ-şou, feysart və digər əyləncələr baş tutacaq.
Tədbir saat 17:00-21:00 arası keçiriləcək. Biletin qiyməti 15 manatdır. Biletləri onlayn əldə etmək olar. Yaş həddi: 14+.
Dekabrın 14-də “Harry Potter and Wizards” (Heydər Əliyev Sarayı)
Heydər Əliyev Sarayında isə sehri hiss etməyə “Tynda.music” simfonik orkestri fürsət yaradacaq. Orkestr “Harri Potter” filmində istifadə olunan musiqilərdən ibarət yeni konsert verəcək.
Tədbir dekabrın 14-də saat 19:00-da baş tutacaq. Biletlərin qiyməti 25-120 manat arasında dəyişir. Biletləri şəhərin kassalarından və onlayn əldə etmək olar.
Dekabrın 23-də “Hoqvarts”da şam yeməyi (Kamera və orqan Musiqisi Zalı)
23 dekabr tarixində Kamera və orqan Musiqisi Zalında Albus Dambldor və Minerva Makqonaqall ilə birgə sehirli şam yeməyi təşkil olunacaq. Tədbir axşamında canlı xor ansamblı ifa edəcək, fotozonalarda şəkil çəkdirmək və şam yeməyinin sonunda “Harri Potter və Fəlsəfə Daşı” filminin qapalı nümayişində iştirak etmək mümkün olacaq.
Şam yeməyi saat 18:00-da baş tutacaq. Biletləri “Wolt” tətbiqi ilə əldə etmək olar. Biletin qiyməti 230 manatdır. Əlavə olaraq, bilet əldə edərkən sizə “Hogwarts”dan məktub və 17 sehrli hədiyyəsi olan bir bağlama göndəriləcək.
Dekabrın 27-də “Harry Potter” (Azərbaycan Dövlət Akademik Filarmoniyası)
Növbəti konsert “Mystery Ensemble” tərəfindən Azərbaycan Dövlət Akademik Filarmoniyasında baş tutacaq. Tədbir “Red EVENTS & Distribution ltd” tərəfindən təşkil və idarə olunacaq.
Konsert dekabrın 27-də saat 20:00-da baş tutacaq. Biletlərin qiyməti 15-80 manat aralığında dəyişir. Biletləri şəhərin kassalarından və onlayn əldə etmək mümkündür.
Yanvarın 2-si və 3-də “Sehrbazlar Məktəbi. Nəhəngin sirri” (“Nizami” Kino Mərkəzi)
Yanvarın 2-si və 3-də uşaqlar üçün “Nizami” Kino Mərkəzində Yeni il multi-şousu – “Sehrbazlar Məktəbi. Nəhəngin sirri” adlı tamaşa olacaq.
Cəsarətli qəhrəmanlar – sehrli müəllimlər Orlana və Flip – gənc sehrbazlarla birlikdə maraqlı nağıl axtarışından keçəcək və sehrli dünyanın sirli yerlərini ziyarət edəcəklər. Tədbirləri idarə etməklə yanaşı, gənc sehrbazlar Yeni il karaokesini oxuyacaqlar, nəqliyyat vasitələrini idarə edərək əylənəcəklər.
Tamaşa saat 12:00-13:00 və 15:00-16:00-da keçiriləcək. Tədbir rus dilində baş tutacaq. Biletlərin qiyməti 10-30 manat aralığında dəyişir. Biletləri şəhərin kassalarında və onlayn əldə etmək mümkündür.
