Bir müddət əvvəl pirotexniki vasitələrin insanların üzərinə atılması ilə bağlı yayılan görüntülərlə bağlı artıq hüquq-mühafizə orqanları tərəfindən lazımi tədbirlər görülüb. Psixoloqlar hesab edirlər ki, əsasən, yeniyetmələrin və azyaşlıların dərk etmədən törətdikləri bu əməllər bir çox insanlarda ömürlük travmalara səbəb ola bilir. Bu haqda bu gün, 29 dekabr tarixində Bakuplus.az ATV Xəbər-ə istinadən məlumat verir.
Psixoloq Aygün Ağabalayeva hesab edir ki, fişəng atılması qoxulara, panikaya səbəb ola bilər. Ölkəmizdə müharibədən sonra posttravmatik sindrom yaşayan insanlar da kifayət qədər çoxdur. Partlayışdan olan səs onların psixikasında da gərginlik yarada bilər.
Psixoloq onu da bildirdi ki, valideynlər bu işdə mütəmadi olaraq övladlarını məlumatlandırmalı, onlara bu məsələnin ciddi problem olduğunu başa salmalıdırlar.
Qanunla qadağan olunan pirotexniki vasitələri haradan və necə əldə edirlər?
“Sədərək” Ticarət Mərkəzində bəzi sıralarda gizli şəkildə, Yeni il bəzəkləri ilə yanaşı, pirotexniki vasitələr də satılır. Burada 5 manatdan başlayaraq 50 manata qədər fişəng və digər pirotexniki vasitələr tapmaq mümkündür.
Məsələ ilə bağlı “Sədərək” Ticarət Mərkəzinin rəhbərliyi bildirdi ki, neqativ halların yaşanmaması üçün sahibkarlara mütəmadi olaraq xəbərdarlıq edilir.
DİN-dən isə bildirildi ki, pirotexniki vasitələrin satışını həyata keçirən şəxslər barəsində mütəmadi olaraq tədbirlər həyata keçirilir. Sözügedən faktla bağlı isə lazımi addımlar atılacaq.
