Elm və Təhsil Nazirliyinə yeni kadr təyinatı olub. Bu haqda bu gün, 26 dekabr tarixində Bakuplus.az Report-a istinadən xəbər verir.
34 yaşlı Kənan Kərimzadə elm və təhsil nazirinin müavini təyin edilib. Bu haqda Prezident İlham Əliyev müvafiq Sərəncam imzalayıb.
Kənan Kərimzadə Bərdə şəhərində anadan olub. O, Azərbaycan Dövlət İqtisad Universitetinin Xüsusi İstedadlar Qrupunda təhsil alıb, bakalavriat səviyyəsini maliyyə və kredit ixtisası üzrə bitirib.
ABŞ-nin Dyuk Universitetinin Beynəlxalq İnkişaf Mərkəzi tərəfindən keçirilən “İqtisadi inkişaf üçün tətbiqi dövlət maliyyəsi” kursunu bitirib. “Edmund S.Muskie Mübadilə Proqramı" çərçivəsində Nyu-Yorkda yerləşən Fordham Universitetində “Beynəlxalq siyasi iqtisad və inkişaf” proqramında təhsil alıb.
ABŞ-nin CFA İnstitutunun “İnvestisiyaların idarə edilməsi” proqramını bitirib və xartiyalı maliyyə təhlilçisi (CFA Charterholder) beynəlxalq akkreditasiyasını əldə edib.
“Capital Motors” MMC-də maliyyə və təhlil üzrə mütəxəssis, “PMD Group” MMC-də investisiyalar üzrə baş mütəxəssis, investisiyalar üzrə rəhbər, departament menecerinin müavini və Strateji planlaşdırma və təhlil şöbəsinin müdiri vəzifələrində çalışıb.
Elm və Təhsil Nazirliyində nazirin müşaviri vəzifəsində işləyib. Nazirliyin Aparat rəhbəri vəzifəsini icra edib. Təhsilin iqtisadiyyatı şöbəsinin müdiri vəzifəsində fəaliyyət göstərir.
