Onlayn platform üzərindən sifariş edən şəxslər yerli blogerlər tərəfindən təqdim olunan promokodlar vasitəsilə endirimdən yararlanmaq istəyiblər. Ancaq çox keçməyib ki, sifarişləri ləğv olunub. Ödədikləri pulun bir hissəsi isə geri qaytarılmayıb. Zərərçəkənlər bu barədə sosial şəbəkələrdə paylaşımlar ediblər. Bu haqda bu gün, 8 noyabr tarixində Bakuplus.az Xəzər Xəbər-ə istinadən məlumat verir.
Həmin şəxslərdən biri Əsmət Rzazadə deyir ki, qaytarılmayan məbləğ Türkiyədaxili karqonun ödənişidir: “Blogerlərin qeyd etdikləri 40 faiz endirimdən istifadə etdim, amma üstündən cəmi 1 gün keçəndən sonra həmin sifarişlər bir-bir ləğv olunmağa başladı. Bizə qeyd etdilər ki, həmin pullar bizim hesabımıza qayıdacaq. Lakin üstündən 6 gün vaxt keçib, amma pullar geri qaytarılmır. Bir hissəsi qayıdıb, amma karqo pulları geri qayıtmadı. Karqoya görə ödənilən 50-55 manat arası pul qayıtmayıb”.
Hüquqşünas Şamil Paşayev bildirir ki, elektron ticarət qaydalarının pozulması, yəni alıcıya göstərilən xidmətin tam yerinə yetirilməməsi inzibati məsuliyyət yaradır. Bu hallara görə hüquqi şəxslərə 4000 manatdan 6000 manatadək cərimə nəzərdə tutulub.
“Əgər vətəndaşa, istehlakçıya hər hansı bir endirim verildisə və bu endirimdən vətəndaş yararlana bilmədisə, ən azı öz pulunu geri almalıdır. Digər xərclər vətəndaşdan tutulmalı deyil, vətəndaşın pulu birmənalı olaraq özünə qaytarılmalıdır”, – deyə hüquqşünas əlavə edib.
Hüquqşünas, həmçinin qeyd etdi ki, ictimai şəxslər bu cür əməkdaşlıqları rəsmi formada həyata keçirməlidirlər ki, həm izləyiciləri zərər çəkməsin, həm də qazandıqları inamı itirməsinlər. Eyni zamanda hüquqlarının pozulduğunu hesab edənlər Antiinhisar və İstehlak Bazarına Nəzərət Dövlət Xidmətinə müraciət edə bilərlər.
Mövzu ilə bağlı bir neçə bloger bildirdi ki, problem təmamilə onlayn platformadan qaynaqlanır. Belə ki, sui-istifadə halları aşkarlandığı və həddindən artıq sifarişlər olduğu üçün qarşı tərəf bu cür tədbirlərə əl atıb.
