Bu gün Xankəndi şəhərində ilk dəfə toy mərasimi keçirilir.
Bakuplus.az “İnsanoid”ə isitnadən xəbər verir ki, toy sahibi tanınmış jurnalist Kərim Kərimlinin oğlu və gənc yazar, Azərbaycan Yazıçılar Birliyinin üzvü Fərhad Kərimlidir.
Fərhad Kərimli qeyd edib ki, azad Xankəndidə toy mərasimi keçirilməsi ənənəyə çevriləcək:
“Çox sevincliyəm. Biz Şuşada yaşayırıq. Xankəndidə toy etməyimizin bir neçə səbəbi var. Xankəndi bizimdir. Uzun illər düşmənin quldur yuvasına çevrilmişdi.
Ötən il bu vaxtı Xankəndi şəhəri işğaldan azad olundu. Düz bir il sonra qərara aldıq ki, toyumuzu Xankəndidə edək. Bu yeni bir ənənəyə çevriləcək. Xankəndi şəhərində ilk toydur. 1988-ci ildən, azərbaycanlılar oradan deportasiya olunandan bu şəhərdə toy mərasimi keçirilməyib. Biz də azad Xankəndidə ilk toy etmək istədik”.
F.Kərimli həyatının qalan hissəsini birlikdə yaşamağa qərar verdiyi xanımla tanışlıqdan da bəhs edib:
Rəvanə xanım Xaçmaz rayonunun Xudat şəhərindəndir. Onlar ailəlikcə ilk dəfə Qarabağda oldular. Bu, Rəvanə üçün yenilikdir. Biz magistraturanı bir yerdə oxumuşuq. Orada tanış olduq. Mənim 24, Rəvanənin 23 yaşı var”.
Qeyd edək ki, Kərim Kərimli bu ilin mayında Şuşaya köçüb və ailəsi orada dördotaqlı mənzillə təmin olunub. Toy Xankəndidə yerləşən “Meydan” restoranında əsasən ailənin yaxın qohumlarının iştirakı ilə baş tutur.
Xatırladaq ki, Xankəndi 1991-ci ildə Ermənistan silahlı qüvvələri tərəfindən işğal edilmişdi. 2023-cü ilin 20 sentyabrında keçirilən antiterror əməliyyatları nəticəsində Azərbaycan Ordusu şəhərə nəzarəti tam bərpa edib.
