Azərbaycan Dillər Universitetinin (ADU) fransız dili müəllimləri və Azərbaycan Fransız Dili Müəllimləri Assosiasiyasının üzvləri Fransa Senatının Azərbaycana qarşı sanksiyaların tətbiqi ilə bağlı qəbul etdiyi qətnaməyə etirazlarını bildiriblər. Bu haqda bu gün, 19 noyabr tarixində Azərtac məlumat verib.
Məktubda müəllimlərin bu qərarı böyük məyusluq və təəccüblə qarşıladıqları və onu ədalətsiz hesab etdikləri bildirilir. Bu qanun layihəsi fransızların "azadlıq, bərabərlik, qardaşlıq", əxlaq və normal siyasi məntiq ideyasına yaddır.
Fransa bu qətnamə ilə Azərbaycandakı nüfuzunu sarsıtmaqla yanaşı, mədəniyyətlərarası əlaqələrin qurulmasına da mane olur. Müəllimlər bunun Azərbaycanda fransız dilinə, ədəbiyyatına və mədəniyyətinə marağın azalmasına səbəb olacağından narahat olduqlarını bildiriblər.
Məktub 32 nəfər tərəfindən imzalanıb.
