Cari ilin fevral ayından etibarən məktəbəqədər təhsillə bağlı alternativ modellərin tətbiqinə başlanılır. Bu haqda bu gün, 19 yanvar tarixində Bakuplus.az Xəzər Xəbər-ə istinadən məlumat verir.
“Müəyyən səbəblərə görə əgər müvafiq yerlərdə bağçalar yoxdursa və həqiqətən orada məktəbəqədər yaşlı uşaqların sayı çoxdursa, o zaman alternativ modellərdən, məsələn icma əsaslı məktəbəqədər təhsil qrupları, dövlət-özəl əməkdaşlığı və yaxud öyrənmə qutusu deyilən modellərlə təhsil tətbiq olunacaq”, – deyə Məktəbəqədər və Ümumi Təhsil üzrə Dövlət Agentliyinin şöbə müdiri İlahə Rəsulova məlumat verib.
O bildirib ki, pilot layihə fevral ayından başlayaraq bir neçə ay davam edəcək. Layihə Bakı ilə yanaşı, Naxçıvan, Astara, Füzuli, Göygöl, Lənkəran, Masallı, Şəki, Şirvan, Zaqatala kimi regionlarda icra olunacaq.
“Əgər bu modellər uğurlu nəticələnsə, artıq növbəti dəfədən həmin modellərin daha geniş şəkildə tədbiqi nəzərdə tutulur”, – deyə Rəsulova əlavə edib.
Layihədə sağlamlıq imkanları məhdud uşaqlar da nəzərə alınıblar.
Bu cür uşaqlar üçün xüsusi pedaqoji-psixoloji tibbi komissiyalar təyin olunur, inklüziv qrupların yaradılması nəzərdə tutulur.
