Bu il paytaxtın mənzil bazarında qiymətlərə söküntü və torpaq sahələrinin olmaması ciddi təsir edib. Ekspertlər bildirirlər ki, hətta ilin əvvəlində 10-15 faizə qədər artım müşahidə edilib. Bu haqda bu gün, 25 dekabr tarixində Bakuplus.az Xəzər Xəbər-ə istinadən məlumat verir.
Əmlak Məsələləri üzrə ekspert Nofəl Quliyev deyir ki, 2022-ci ilin oktyabr ayından, yəni Rusiya-Ukrayna müharibəsi başlayandan sonra Azərbaycana insan axını, o cümlədən də kapital axını baş verdi. Bundan sonra mənzil bazarında canlanma yarandı. Bu da qiymətlərə təsir edən amillərdən biridir. Bəs növbəti ildə Azərbaycanda əmlak bazarında qiymətlərin enməsi müşahidə ediləcək?
Ekspertin sözlərinə görə, gələn ildə qiymətlərdə stabillik olmaqla bərabər cüzi olsa da, artım müşahidə olunacaq. Tikinti resursları, əsasən, Ukraynadan, Rusiyadan, xaricdən gətirildiyinə görə gələcəkdə tikinti bazarında müəyyən qiymət artımı müşahidə oluna bilər. Bu da öz növbəsində mənzil bazarına öz təsirini göstərir.
Ekspert hesab edir ki, paytaxtda torpaq sahəsinin azlığı da qiymətlərə təsir edir. Bəzi tikinti şirkətləri məcbur olur ki, şəhərin mərkəzi hissələrində istismar müddətini başa vuran köhnə binaların sakinləri ilə razılığa gəlsin və söküntü işləri apararaq yerində çoxmənzilli bina inşa etsin. Belə halların da ildən ilə artması qiymətlərə təsir edir.
“Bildiyimiz kimi, Bakı şəhərinin ümumi planı təsdiq olunub və yaxın müddətdə icra olunacaq. Ona görə də Bakı şəhərinin mərkəzində və ya mərkəzdən bir az kənarda olan 1-2 mərtəbəli evlərin hamısı sökülüb, yerində yeni çoxmənzilli, çoxmərtəbəli binalar tikiləcək. Ona görə də məznillərin qiymətində cüzi də olsa, artım müşahidə olunacaq. 2024-cü ildə bu tendensiya davam edəcək, qiymətlərdə enmə olmayacaq”, – deyə Nofəl Quliyev əlavə edib.
2024-cü ildə də mənzil bazarında qiymətlərin 10-15% yüksələcəyi ehtimal olunur. Ümumi artım tendensiyasının köhnə binalara da təsir göstərəcəyi, amma bunun yeni tikililərdəki qədər olmayacağı gözlənilir.
