“Əhmədli”, “Qara Qarayev”, “Xalqlar Dostluğu” metro stansiyalarından birbaşa “Sədərək” ticarət mərkəzinə getmək üçün əvvəllər marşrut xətti olub, indi isə yoxdur. Bu haqda bu gün, 14 dekabr tarixində Bakuplus.az ATV-yə istinadən məlumat verir.
Minlərlə sərnişin gün ərzində “Əhmədli”, “Qara Qarayev”, “Xalqlar Dostluğu” metro stansiyalarının yaxınlığından “Sədərək” ticarət mərkəzinə həm işləməyə, həm də alış-veriş etməyə gedir. Həmin istiqamətlərdən birbaşa ticarət mərkəzinə gedən marşrut xəttinin olmamasından onlar məcburiyyətdən bir neçə avtobus dəyişirlər.
“Sədərək” ticarət mərkəzinin mətbuat katibi Kəmaləddin Qədim bildirdi ki, sərnişin və satıcıların yaşadığı problemdən onlar da xəbərdardırlar. Əvvəl “Xalqlar Dostluğu” metro stansiyasının qarşısından ticarət mərkəzi istiqamətində 194 saylı avtobus fəaliyyət göstərirdi. Amma sonradan onun hərəkəti dayandırıldı.
Bakı Nəqliyyat Agentliyindən (BNA) isə bildirildi ki, 8-ci kilometr qəsəbəsindən “Sədərək” ticarət mərkəzi istiqamətində E2 marşrut xəttinin yaradılması ilə bağlı qərar qəbul olunub. Lakin həmin xətlə bağlı müsabiqənin elan edilməsinə baxmayaraq, hər hansı bir daşıyıcı bu marşrut xəttinə maraq göstərməyib. Amma sərnişinlərin müraciəti nəzərə alınaraq, BNA tərəfindən yaxın vaxtlarda 8-ci km qəsəbəsindən “Sədərək” ticarət mərkəzinə birbaşa marşrut xəttinin fəaliyyətə başlaması ilə bağlı müvafiq tədbir görüləcək.
