Yasamal rayonunda “Tullantıları hədiyyələrə dəyiş” festivalı baş tutub. Bu haqda bu gün, 21 mart tarixində Bakuplus.az Ekologiya və Təbii Sərvətlər Nazirliyinə (ETSN) istinadən xəbər verir.
Hüseyn Cavid parkında Qlobal Təkrar Emal Günü ilə əlaqədar “Tullantıları hədiyyələrə dəyiş” festivalı keçirilib. Tədbir zamanı ümumi tutumu 403 litr olan plastik, 343 litr şüşə tullantı, 373 ədəd işlənmiş batareya vətəndaşlar tərəfindən təhvil verilib.
Keçirilən festivalda uşaqlar üçün maraqlı viktorinalar təşkil edilib, müxtəlif müsabiqələr keçirilib. Tullantı təhvil verərək təbiətə töhfə verən vətəndaşlara müxtəlif növ ağac tingləri, ekoçantalar, milli parklara giriş biletləri, ətraf mühitin mühafizəsi ilə bağlı dərsdənkənar vəsaitlər və məktəb ləvazimatları təqdim edilib.
