Suraxanı rayonu, Hövsan bağlar massivinin sakinləri 35 ildir ki, susuz yaşayırlar. Bu illər ərzində bəzi qonşular özləri üçün fərdi qaydada su xətti çəkdirsələr də, buna maddi imkanı əl verməyən əksər ailələr suyu hələ də maşınlarla almağa məcburdurlar. Bu haqda bu gün, 20 iyun tarixində Bakuplus.az İTV-yə istinadən məlumat verir.
Sakinlər deyirlər ki, dəfələrlə müvafiq qurumlara müraciət ediblər, ancaq onlara cavab verən olmayıb.
“Azərsu” ASC-dən bildirdilər ki, məsələdən xəbərdardırlar.
“Bizim Abşeron yarımadası ilə bağlı master-planımız var. Həmin master-plana əsasən, hər bir yaşayış məntəqəsində, o cümlədən bağlar massivində də şəbəkələrin quraşdırılması nəzərdə tutulur. Bunlar da dövlət investisiyaları hesabına mərhələlərlə icra olunur. 2023-cü il üçün layihə planlarında həmin o ərazidə şəbəkənin yaradılması işləri nəzərdə tutulmayıb. Növbəti mərhələlərdə və növbəti dövrlər üçün artıq o layihənin orada icra olunması təsdiqlənəcək və ayrılmış maliyyə hesabına uyğun olaraq həyata keçirilə biləcək”, - qurumun sözçüsü Anar Cəbrayıllı deyib.
