Bakının Suraxanı rayonu, Hövsan qəsəbəsində yeni mərkəzləşdirilmiş içməli su xətti quraşdırılır. Bu haqda bu gün, 15 noyabr tarixində Bakuplus.az “Azərsu” ASC-yə istinadən xəbər verir.
Verilən məlumata əsasən, Quşçuluq massivi ərazisində tikilən evlərdə su sakinlər tərəfindən çəkilib və tikinti normalarına cavab vermir. Digər hissənin sakinləri isə evlərə içməli suyu maşınlarla alırdılar. Bu səbəbdən massivdə içməli su təchizatı şəbəkəsinin yaradılmasına qərar verilib.
Tikinti işləri bitəndən sonra ərazidə 1200-ə qədər sakin dayanıqlı içməli su ilə təmin olunacaq. Orada 6 km uzunluğunda yeni şəbəkə yaradılır, 280 sakinin evinə sayğaclar quraşdırılacaq. Şəbəkədə suyun optimal idarə edilməsi üçün 15 siyirtmə və yanğın təhlükəsizliyi üçün 3 yanğın hidrantı olacaq.
