Bakının Xəzər rayonu, Buzovna qəsəbəsi ərazisində yerləşən çimərliyə giriş sərbəst olacaq. Bu haqda bu gün, 19 iyun tarixində Bakuplus.az ARB Xəbər-ə istinadən məlumat verir.
Reportajda türkiyəli iş adamı, hasara alınmış ərazidə tikilmiş istirahət mərkəzinin sahibi Mehmet Uysal Azərbaycan qanunvericiliyi çərçivəsində sahibkar kimi fəaliyyət göstərdiyini, ərazini abadlaşdırdığını və Buzovna sakinlərini işlə təmin etdiyini bildirib.
“Çimərliyin bu ərazisi tərk edilmiş olub, biz onu təmizlədik, ziyarətçilər üçün təhlükəsiz etdik. Vətəndaşların dənizə getməsinə heç bir qadağa yoxdur, sahilə pulsuz keçidlər var. Biz insanlar üçün çalışırıq və ziyarətçilər üçün pulsuz sayt ayırmışıq. Burada 60-a yaxın insan çalışır ki, onların da çoxu Buzovna qəsəbəsinin sakinləridir”, - deyə Uysal bildirib.
Daha öncə məlum olub ki, naməlum şəxslər tərəfindən Buzovna çimərliyində mühafizəçi kabinəsi olan yeni şlaqbaum quraşdırılıb, qum üzərinə asfalt vurulub və hazırda geniş ərazidə çimərlik ərazisi qayalıqlardan başlayaraq məftil hasarla hasarlanıb.
Məsələ ilə bağlı Xəzər rayon İcra Hakimiyyəti hələ ki açıqlama verməyib.
