Havaların soyuq keçməsi əhalinin təbii qaza olan təlabatını artırır. Qazdan istifadəyə qoyulan limitin ləğvi mövzusu cəmiyyətdə yenidən aktuallaşıb. Bu haqda bu gün, 23 noyabr tarixində Bakuplus.az ARB Xəbər-ə istinadən məlumat verir.
Hazırda Azərbaycanda qazla bağlı əhalinin illik istehlakının 1200 kub metrədək olan hissəsi üçün tariflər 12 qəpikdən hesablanır. Qış mövsümündə bir ailənin aylıq istilik xərci 120-150 manatı ötür ki, bu da 12 qəpiklik limitin bir ayda başa çatması deməkdir. Abonentlər soyuq ayların qalan günlərində kub metrə görə 20, daha sonra isə 25 qəpik ödəməyə məcburdurlar.
Mərkəzi istilik sistemi ilə evini isidənlərin belə bir problemi olmasa da, həyət evlərində yaşayan ailələr soyuq aylarda istiliyə təlabatın artması nəticəsində ilin başlanğıcında limitə düşürlər. Hazırkı tariflərin də gəlirlərlə nisbətdə baha olduğunu deyənlər var. Təbiidir ki, sakinlər qazdan limitsiz istifadə etmək istəyirlər.
Məsələ parlamentdə də tez-tez gündəmə gətirilir. Əksər ekspertlər ölkəmizdə qaza tətbiq edilən limitin aradan qaldırılmasını vacib sayırlar. İqtisadçıların sözlərinə görə, birmənalı olaraq limitin aradan qaldırılması ilə bağlı qərar vermək mümkün deyilsə, ən azından onun həcminə yenidən baxılmasına ehtiyac var.
“Azəriqaz” İB-nin İctimaiyyətlə əlaqələr şöbəsinin rəisi Eldəniz Vəliyev deyir ki, ötən il limiti keçməyən istifadəçi sayı 50 faiz üzərində idisə, son 10 ayın statistik məlumatlarına görə bu il abonentlərin 60,2 faizi 12 qəpiklik limiti keçməyib. 1200 kub metrlik limiti keçən abonentlərin 30,9 faizi 20 qəpikdən, 3,4 faizi isə 25 qəpikdən ödəyir. Bu isə o deməkdir ki, il ərzində əhalinin nisbətən aztəminatlı hissəsi 12 qəpiklik limitdən istifadə edib.
Beləliklə, hazırkı reallığı nəzərə almaqla ölkəmizdə qaz limitlərinin təmamilə ləğv edilməsi gözlənilmir.
