Bakıda falçılıq edən dələduz qadın barəsində məhkəmə qərar çıxarıb. Bu haqda bu gün, 27 dekabr tarixində Bakuplus.az Qafqazinfo-ya istinadən xəbər verir.
Bakı Ağır Cinayətlər Məhkəməsinin qərarı ilə 21 yaşlı Lamiyənin 2 il 8 ay 4 gün müddətinə azadlığı məhdudlaşdırılıb.
Lamiyə İnstagram sosial şəbəkəsində səhifə açaraq özünü falçı kimi qələmə verib və müxtəlif insanlardan ümumilikdə 4000 AZN-ə yaxın pul mənimsəyib.
Onun müştərilərindən biri həyat yoldaşı ilə küskünlüyü aradan qaldırmaq üçün falçıya müraciət edib. Lamiyə də 970 AZN qarşılığında ona şam təqdim edib və onu gecə 00:00-da yandıraraq xüsusi dualar oxumalı olduğunu bildirib.
Digər qadına isə həmin şamları 1700 AZN-ə satıb.
Başqa bir müştərinin falına baxan Lamiyə ona şəxsi və iş həyatında böyük problemlərlə üzləşəcəyini, oğlunun öləcəyini, cadu olunduğunu, üstündə ağırlıq qaldığını bildirib. Bunun qarşısını alması üçün falçı müştəridən öncə 500 AZN, daha sonra oğlunun ölümünə 1 ay qaldığı və onu qurtarmaq üçün daha 700 AZN tələb edib.
