Küçədə hazırlanıb satılan fastfud çox vaxt sağlamlıqla bağlı fəsadlara səbəb olur. Satıcılar eyni yağda dəfələrlə pirojki, qutab və digər bu kimi yeməklər hazırlayırlar, bu da ağır xəstəliklərə yol açır. Bu haqda bu gün, 27 noyabr tarixində Bakuplus.az AzTV-yə istinadən məlumat verir.
Satıcıların sözlərinə görə, xəmir yeməklərin bişirildiyi yağlar gündə bir neçə dəfə dəyişdirilir. Bəzi satıcılar isə açıq etiraf edirlər ki, yağı iki gündən bir yeniləyirlər. Yağların gec dəyişdirilməsi isə orqanizm üçün ciddi təhlükədir.
Azad İstehlakçılar Birliyinin rəhbəri Eyyub Hüseynov bildirib ki, yağ dəfələrlə bişirildikdən sonra insan sağlamlığı üçün zərərli olan trans yağa çevrilir. Laboratoriyalarda lakmus kağızından istifadə edilərək xüsusi analiz aparılır. Yağ zəhərli olduqda, marker rəngini uyğun rəngə dəyişir. Hüseynovun sözlərinə görə, satıcılar da analoji yoxlama aparmalıdırlar: yağın rəngi dəyişərsə, bundan sonra ondan istifadə etməməlidirlər.
Azərbaycan Qida Təhlükəsizliyi Agentliyindən bildirildi ki, belə məkanlarda mütəmadi olaraq yoxlamalar aparılır, müvafiq tədbirlər görülür. Ümumilikdə isə vətəndaşlara küçə qidalarından uzaq durmaq tövsiyə olunur.
“Dəfələrlə qızdırılan yağlarda hazırlanan qidanın istehlakı orqanizmdə ciddi fəsadlara gətirib çıxara bilir. Yağların müxtəlif şəraitdə, yüksək temperaturda qızıdırılması zamanı fiziki-kimyəvi xüsusiyyətləri dəyişir. Xüsusən də açıq hava şəraitində bir neçə kimyəvi reaksiya baş verir və yağlar degenerasiya olunur. Təkrar qızdırılmış yağdan hazırlanmış qidaların mütəmadi istehlakı orqanizmin antioksidant müdafiə sistemini poza bilir və ürək damar xəstəliklərinin, diabetin də yaranması riskini artırır”, – deyə Azərbaycan Qida Təhlükəsizliyi İnstitutunun mütəxəssisi Aynur Həsənova izah edib.
