Noyabrın 15-də Bakıda istilik mövsümü başlayır. Bu səbəbdən də müvafiq qurumlar hazırlıqlar görür. Bütün istilik təchizat müəssisələrində təmir-bərpa işləri tamamlanıb. Son sınaq sazlama işləri isə yekunlaşmaq üzrədir. Bu haqda bu gün, 14 noyabr tarixində Bakuplus.az İTV Xəbər-ə istinadən məlumat verir.
“Bu il payız-qış mövsümündə 561 qazanxananın və 88 istilik məntəqəsinin istismarı nəzərdə tutulur ki, bu qazanxanalar vasitəsilə 3863 yaşayış binasının, 184 min mənzilin, 287 orta məktəbin, 158 uşaq bağçasının, 150 səhiyyə obyektinin və 2200-dən çox təsərrüfat hesablı obyektlərin istiliklə təmin olunması nəzərdə tutulur. Bütün zəruri tədbirlər görülüb, obyektlərin istiliklə təmin olunması üçün hal-hazırda heç bir problem yoxdur”, – deyə “Azəristiliktəchizat” ASC-nin şöbə rəisi Xəqani Süleymanlı bildirib.
“Azərsu” isə hələ avqustdan hazırlıqlara başlayıb. Qurum tərəfindən daşıyıcı kollektorlar, kanalizasiya nasos stansiyaları, xətlər, baxış quyuları, nasos stansiyaları təftiş edilib. Dəyişdirilməyə və ya təmirə ehtiyacı olan yerlərdə lazımı işlər görülüb.
“Azərsu” ASC-nin şöbə rəisi Anar Cəbrayıllının sözlərinə görə, 100 km-dən artıq kanalizasiya kollektorları və xətlərinin xüsusi maşınlarla yüksəktəzyiqli su ilə təmizlənmə işləri həyata keçirilib. Eyni zamanda 4000-dən artıq kanalizasiya baxış quyusunun və yağış barmaqlıqlarının təmizlənməsi işləri həyata keçirilib. Kanalizasiya nasos stansiyalarında sazlama təmir işləri aparılıb və artıq hər biri pik rejimdə işləməyə tam hazırdır. Bu stansiyaların işi yağış və qar sularının qısa zamanda kenarlaşdırılması üçün vacibdir.
“Azəriqaz” İB-dən isə bir çox ərazilərin qazla təmin edildiyi bildirilib.
Qurumdan, həmçinin bildirildi ki, bu il qaz təminatı ilə bağlı istehlakçılarda hər hansı bir problem yaranmayacaq. Müvəqqəti və lokal dayanmalar baş versə belə, ən qısa zamanda aradan qaldırılacaq. Buna baxmayaraq, qurum rəsmisi istehlakçıları mavi yanacaqdan istifadə edərkən təhlükəsizlik qaydalarına riayət etməyə və diqqətli olmağa çağırır.
