Bakıda bünövrədən evi necə təhlükəsiz almaq olar? Bu haqda bu gün, 19 fevral tarixində Bakuplus.az ATV-yə istinadən xəbər verir.
Bakıda vətəndaşlar adətən evləri bünövrəsi qoyulanda (kotlovan) alırlar. Buna səbəb həmin mənzillərin hazır evlərdən nisbətən daha ucuz olmasıdır. Qiymətdə təqribən 7-15% fərq olur.
Ancaq bünövrə evləri alan sakinlər tez-tez bir sıra problemlərlə üzləşirlər. Bəzən binanın tikintisi deyilən vaxtdan uzun çəkir və ya ümumiyyətlə axıra çatdırılmır. Sənədləşmə zamanı nöqsanlara yol açılır, 1 ev bir neçə nəfərə satılır.
Ekspertlərin sözlərinə görə, alıcılar hazır və çıxarışlı (kupçalı) mənzilləri almağa üstünlük verməlidirlər. Çünki evin sənədi olmayanda tikinti şirkətini məhkəməyə vermək də çətin olur.
Əmlak və inşaat üzrə ekspert Elnur Azadov tövsiyə edir ki, alıcılar tikinti şirkətlərini araşdırsınlar, onların reputasiyası ilə maraqlansınlar.
“Neçə dənə bina inşa ediblər? Vaxtlı-vaxtında həmin binaların istismara qəbulu baş tutub, ya yox? Bina tikiləndən sonra idarəetmə sakinlərə verilirmi?” – deyə o qeyd edib.
Bünövrədən satılan mənzillərdə rast gəlinən daha bir problem isə müqavilədə tikinti şirkətlərinin özlərinin maraqlarına uyğun bəndlərin qeyd etməsidir. Odur ki, mütəxəssislər alıcılara sənədləşmə işlərində diqqətli olmağı məsləhət görürlər.
“Heç bir halda nağd şəkildə pulu ödəmək tövsiyə olunmur. Vəsaiti birbaşa tikinti şirkətlərinin hesablarına köçürülmək, bina inşa olunduqca ödənişləri də mərhələli şəkildə aparmaq tövsiyə olunur”, – deyə ekspert əlavə edib.
Bundan əlavə, mənzilləri satarkən binanın ölçüsünün torpaq sahəsi ilə hesablanması qanunsuzdur. Qanuna əsasən, mənzillərin ümumi sahəsi bayır və məhəccərlərin yerləşdiyi sahələr nəzərə alınmadan hesablanır. Əgər vətəndaş aldadılıbsa, o, məhkəməyə müraciət edə bilər.
