Azərbaycan Yerüstü Nəqliyyat Agentliyi, Bakı Nəqliyyat Agentliyi və Baş Dövlət Yol Polisi İdarəsinin əməkdaşları tərəfindən Lökbatan rayonu ərazisində qeyri-qanuni sərnişindaşımanın qarşısı alınıb. Bu haqda bu gün, 28 aprel tarixində Avtosfer məlumat verib.
Lökbatan dairəsindən 300 metr məsafədə dəmir məhəccərlər quraşdırılıb, dayanma-durmanı qadağan edən yol nişanları qoyulub, ərazi kameralarla nəzarətdə saxlanılır. Qaydaları pozan sürücülərə elektron protokollar tərtib edilir.
Sürücülər buna etiraz edərək ərazisi abadlaşdırılan və hələ də pulsuz olan Beynəlxalq Avtovağzal ərazisinə daxil olmaq istəmirlər.
Baş Dövlət Yol Polisi İdarəsinin bölmə rəisi, polis mayoru Rövşən Tağıyev bildirib ki, ərazi polis əməkdaşlarının daimi nəzarətində olacaq, qanunsuz fəaliyyətlə məşğul olan sürücülər barəsində müvafiq tədbirlər görüləcək.
AYNA-nın mətbuat xidmətinin rəhbəri Tural Orucov bildirib ki, işçilər 3 gündür ki, burada nəzarət tədbirləri həyata keçirirlər. Sərnişinlər qanunun tətbiq olunduğu avtovağzal ərazisinə yönəldilirlər. Amma sürücülər israrlıdırlar. AYNA məsələ ilə bağlı aidiyyəti qurumlar qarşısında məsələ qaldırıb və məsələ həllini tapacaq.
