Qaradağ rayonu, Lökbatan qəsəbəsi, Lökbatan gölünün bir addımlığında göl ərazisi torpaqla doldurularaq torpaq sahəsi kimi tikinti üçün satılır. Ərazidə artıq bir neçə ev tikilərək istifadəyə verilib, bir neçəsi isə hazırda tikilir. Bu haqda bu gün, 4 aprel tarixində Bakuplus.az Baku TV-yə istinadən məlumat verir.
Yaxınlıqda yaşayan sakinlər bildirirlər ki, ərazidə tikinti işləri bir neçə aydır aparılır. Ərazidə fəaliyyət göstərən ustalar isə bildirirlər ki, torpaq sahələrində aidiyyəti qurumlar tərəfindən baxışlar keçirilmir.
Jurnalistlər məsələ ilə bağlı Qaradağ RİH-nin başçısı Süleyman Mikayılovla əlaqə saxlayıblar. Lakin rayon rəhbəri zəng edənin jurnalist olduğunu və mövzunun mahiyyətini eşidər-eşitməz dəstəyi asıb.
Lökbatan Bələdiyyəsindən bildirildi ki, Lökbatan gölünün sahil hissəsinin torpaqla doldurulması 10 il əvvəl həyata keçirilib.
Lökbatan Bələdiyyəsinin əməkdaşı Saleh Salayevin sözlərinə görə, tikinti işləri 10 il əvvəl aparılıb. Hazırda isə mütəmadi olaraq monitorinqlər keçirilir, Ekologiya və Təbii Sərvətlər Nazirliyi tərəfindən müvafiq cərimələr tətbiq olunur.
Ekspertlər əmindirlər ki, Lökbatan gölünün sahili torpaqla doldurulmaqla yaşayış sahəsinə çevrilir. Ancaq bu ərazidə zamanla yeraltı qrunt sularının toplanması gələcəkdə təhlükə yaradacaq.
