Bakının Qaradağ rayonu, Lökbatan qəsəbəsi, Bilal Niftəliyev küçəsində kanalizasiya suları yollara axır, və bu da ətrafda antisanitar vəziyyət yaradır. Bu barədə bu gün, 28 iyun tarixində Oxu.az məlumat verib.
Sakinlərin sözlərinə görə, qeyd olunan küçədə nəfəs almaq mümkün olmur, hətta burada polis bölməsi də yerləşir.
"Burada nəfəs almaq mümkün deyil. Müvafiq strukturlar bu məsələnin həlli üçün heç bir tədbir görmür. Dəfələrlə "Azərsu" ASC-yə, Mənzil İstismar Sahəsinə, İcra Hakimiyyətinə müraciət etsək də, şikayətlərimizə baxılmır", - deyə sakinlər öz şikayətini bildirirlər.
Məsələ ilə bağlı “Azərsu” ASC-dən bildirilib ki, kanalizasiya xəttində sızma aşkar edilib.
“Əraziyə qurum əməkdaşları tərəfindən baxış keçirilib. Araşdırma zamanı kanalizasiya xəttində müvafiq hissənin dəyişdirilməsinə ehtiyac olduğu müəyyən edilib. Kanalizasiya xəttinin təxminən 15 metrlik hissəsi yenilənəcək”, - qurumdan məlumat verilib.
