Son zamanlar ölkədə fırıldaqçı turizm şirklətlərinin sayı artıb. Bu haqda bu gün, 24 noyabr tarixində Bakuplus.az ATV-yə istinadən xəbər verir.
Belə ki, şirkətlər müxtəlif turpaketləri aşağı qiymətə təklif edərək vətəndaşların diqqətini çəkirlər. Onların nə dərəcədə güvənli olduğu isə arxa planda qalır.
Bu il “Nilay Travel” şirkətinin direktoru olan Ünal Əliyevə Türkiyəyə səyahət üçün 4090 AZN vermişəm. 1 ay sonra Ünal Əliyevin anası kimi özünü təqdim edən İradə adlı xanım mənə zəng edib yalvarıb ki, oğlu həmin pulları naməlum yerə xərcləyib və söz verib ki, tezliklə qaytaracaq. Lakin bu günə qədər heç nə qaytarılmayıb”, – deyə zərərçəkən qeyd edib.
Bu sahə üzrə ixtisaslaşan şirkətlərdən birinin rəhbəri Rəhman Quliyevin sözlərinə görə, vətəndaşlar turpaket alarkən həmin turizm şirkətinin imicinə, dayanıqlı olmasına mütləq fikir verməlidir.
“Ofis olan şirkətə yaxınlaşmalıdırlar. Əgər hər hansı turizm şirkətinin ofisi yoxdursa, demək, orada böyük bir yanlışlıq var. Həmin turizm şirkətinin əməkdaşı ilə birbaşa əlaqəyə girib həmin turla bağlı müqavilə bağlamalıdırlar. Müqavilədə tur proqramı öz əksini tapmalıdır və şirkətə ödənilən pulun qəbzi alınmalıdır”, – deyə o əlavə edib.
Daxili İşlər Nazirliyindən məsələ ilə bağlı bildiriblər ki, vətəndaşların inam və etibarından aldatma yolu ilə dələduzluq əməlləri ilə bağlı polisə daxil olan bütün müraciətlər diqqətlə araşdırılır.
