Bakıda məşhur omanlı yazıçı ilə görüş keçiriləcək. Bu haqda bu gün, 9 noyabr tarixində Bakuplus.az Qafqazinfo-ya istinadən xəbər verir.
“The Man Booker” mükafatının laureatı, omanlı yazıçı Coxa əl-Harsi IX Bakı Beynəlxalq Kitab Sərgisində iştirak edəcək. Yazıçı ilə imza günü 12 noyabr tarixində saat 12:00-da Bakı Ekspo Mərkəzində baş tutacaq. 13 noyabr saat 12:00-da isə eyni məkanda onunla yerli müəlliflərin müzakirə saatı keçiriləcək.
45 yaşlı Coxa əl-Harsi 2019-cu ildə Olqa Tokarçuk, Anri Erno, Xuan Qabriel Vaskes kimi məşhur yazıçıları qabaqlayaraq “Ayın qızları” romanı ilə nüfuzlu “The Man Booker” beynəlxalq mükafatını qazanıb. Romanın əsas qəhrəmanları Omanın Əvafi şəhərində yaşayan üç bacıdır. Onlar və ailələri, onların itkiləri və sevgiləri ənənəvi ağa-nökər münasibətlər sistemindəki hazırkı mürəkkəb quruluşa keçid edən və sürətlə dəyişən Omanın ictimai ziddiyyətləri fonunda əks etdirilir. Əsərdə üç bacının timsalında cəmiyyətin bütün zümrələri oxuculara təqdim olunur.
Sözügedən roman “Parlaq İmzalar” nəşriyyatı tərəfindən ərəbcədən Azərbaycan dilinə tərcümə edilərək nəşr olunub. Kitabın tərcüməçisi Aytəkin Qocayeva, redaktoru isə Rəşad Həsənovdur.
