Əmək kitabçasının ləğv olunması planlaşdırılır? Bu haqda bu gün, 8 fevral tarixində Bakuplus.az ATV Show-ya istinadən xəbər verir.
Sosial şəbəkələrdə bəzi hüquqşünaslar vətəndaş cəmiyyəti arasında əmək kitabçasının ləğv olunması barəsində fikirlər səsləndirirlər.
Ekspertlərin fikrincə, əmək kitabçasına artıq ehtiyac yoxdur.
“2006-cı ilə qədər işləyənlərin əmək pensiyası ilə bağlı bəzi problemlər ola bilər. Ancaq hamının məlumatları elektron formadadır”, - deyə hüquqşünas Sahib Məmmədov qeyd edib.
Onun sözlərinə görə, əmək kitabçası gələn ildən artıq dövriyyədən çıxarıla bilər.
“Artıq elektron informasiya sistemində bütün məlumatlar toplanılır. Kimin ehtiyacı varsa, hamı oradan çıxarış ala bilər”, - deyə hüquqşünas əlavə edib.
Bundan əlavə, əmək kitabçalarının həm işəgötürən üçün, həm də dövlət üçün külli miqdarda vəsait itirilməsinə səbəb olduğu qeyd olunub.
Dövlət Məşğulluq Agentliyinin Beynəlxalq Tərəfdaşlıq və Strateji Departamentinin əməkdaşı Hacı Əliyev deyib ki, ölkədə əmək müqavilələrinin elektron sistemlə bağlanılması 2014-cü ildən sonra tətbiq olunub. Qeyd olunan ildən öncə isə sistemdə məlumat yoxdur. Yeni layihə hazırlanır, bütün məsələlər həll olunacaq.
