Əmək və Əhalinin Sosial Müdafiəsi Nazirliyi (ƏƏSMN) Bakı şəhərinin Ramana, Ümid, Kürdəxanı qəsəbələrində yerləşən binalarda mənzillərin 23 yanvar 2023-cü il saat 10:00-dan onlayn satışına başlayacaq. Bu haqda bu gün, 26 dekabr tarixində nazirliyin mətbuat xidmətinə istinadən Bakuplus.az məlumat verir.
Satış nazirlik tərəfindən hazırlanmış ms.sosial.gov.az elektron portalı vasitəsilə həyata keçiriləcək. Portalda mənzillər haqqında (ünvan, binadakı mərtəbələrin sayı, mənzilin qiyməti, sahəsi, mərtəbəsi, otaqların sayı, təmir vəziyyəti və s.) məlumat verilir.
Mənzil almaq istəyənlər portala daxil olub təkliflərlə tanış ola bilərlər. Portalda mənzil satıldığı andan onu ilk seçən şəxs alış hüququ qazanacaq.
Bunun üçün vətəndaş ilk növbədə “ASAN Login” sistemi vasitəsilə portaldakı şəxsi kabinetinə daxil olmalıdır. Vətəndaşla nazirlik arasında uğurlu mənzil seçimindən və 10 gün müddətində yaşayış sahəsinin bütün dəyəri ödənildikdən sonra alqı-satqı müqaviləsi bağlanacaq.
Portal vasitəsilə mənzillərin satışı 1 iyul 2023-cü il tarixinədək davam edəcək.
