“Azərbaycan Mərkəzi Bankı (AMB) ölkədə məsafədən kreditləşmənin tənzimlənməsini planlaşdırır”.
Bunu qurumun Kredit təşkilatlarının fəaliyyətinə nəzarət departamentinin şöbə rəisi Xəyyam İsmayılov ötən gün Bakıda keçirilən “Dayanıqlı mikromaliyyə üçün innovativ həllər” mövzusunda Azərbaycan Mikromaliyyə Konfransında bildirib.
“Bu istiqamətdə beynəlxalq təcrübə araşdırılır və yerli prioritetlər nəzərə alınmaqla məsafədən kreditləşmənin ümumi şərtləri müəyyən ediləcək. Əsas məqsəd istehlakçıların hüquqlarının qorunması və onların izafi borclanmasının qarşısının alınmasıdır”, - deyə o qeyd edib.
Maraqlıdır, məsafədən kreditləşmə bütün banklaramı şamil ediləcək? Bu addım hansı imkanları yarada bilər?
Mövzu ilə bağlı BakuPlus.az-a açıqlama verən iqtisadçı-ekspert Xalid Kərimlinin sözlərinə görə, Mərkəzi Bank bütün banklarda məsafədən kreditləşməni tənzimləməyi düşünür:
“Məsafədən kreditləşmə, müştərilərin fiziki olaraq bank və ya maliyyə qurumlarına getmədən, onlayn platformalar vasitəsilə kredit alması prosesidir. Müştəri onlayn platforma üzərindən kredit üçün müraciət edir, şəxsi məlumatları, maliyyə vəziyyəti və istədiyi kredit məbləği qeyd olunur. Bank və ya maliyyə qurumu müştərinin kredit müraciətini qiymətləndirir. Burada müştərinin kredit tarixi, gəlirləri və digər maliyyə göstəriciləri nəzərə alınır.
Müraciət təsdiq edildikdən sonra müştəriyə kredit şərtləri təqdim olunur. Müştəri razılaşarsa, müqavilə imzalanır. Məsafədən kreditləşmənin üstünlükləri odur ki, sürətli həyata keçirilir və vaxt itkisi olmur. Mərkəzi Bank bunu genişləndirmək haqqında düşünür ki, bütün banklar məsafədən kreditləşməni həyata keçirə bilsin”.
Ekspert qeyd edib ki, kredit xərcləmə davranışlarına görə də müəyyən edilə bilər:
“Bəzi bankların rəqəmsal variantı var. Həmin banklar onlayn krediti rahatlıqla verə bilir. Lakin bu, bütün banklara şamil edilmir. Eyni zamanda bunu genişləndirmək riskin idarə edilməsi, istehlakçıların həddən artıq yüklənməsinin qarşısını alacaq.
Kredit götürüləndə gəlir və öhdəliyə baxılırdı. Amma məsafədən kreditləşmədə xərclənmə davranışlarına diqqət edilə bilər”.
X.Kərimli əlavə edib ki, bank sektorunun rəqəmsal platformasını inkişaf etdirmək lazımdır:
“İdarə edilmənin formalaşdırılmasına və qaydalarının təkmilləşdirilməsinə ehtiyac var. Mərkəzi Bank bu sahədə işlər gördüyünə dair bəyanat verib. Daha geniş tətbiq edilməsi məsələsi Mərkəzi Bankın strategiyasında bazara təqdim edilib”.
Nəzrin Vahid
