Bakının bir çox mağazalarında satıcılar “endirim” adı altında müştəriləri aldatmağa çalışırlar. “Black Friday” (“Qara Cümə”) endirim həftəsindən yararlanmaq istəyən vətəndaşlar marketinq torlarına düşürlər və əksinə, digər aylara nisbətən daha çox pul xərcləyirlər. Bu haqda bu gün, 28 noyabr tarixində Bakuplus.az Baku TV-yə istinadən məlumat verir.
Elanlarda 50 faizdən 70 faizədək endirim qeyd olunur. Lakin yaxınlaşdıqda müştərilər görürlər ki, 70 faizə qədər endirim nəzərdə tutulub. Yani bu 10 faiz də ola bilər, 1 faiz də ola bilər, ümumiyyətlə, heç endirim olmaya da bilər.
Marketinq üzrə mütəxəssis Müşfiq İsgəndərov qeyd edib ki, məhsulların və yaxud xidmətin satılması zamanı çox ciddi dələduzluq hallarına yol verilir. Bunların içində endirim halları və endirim adı altında yanlış kommunikasiyalar mövcuddur. Məsələn, 70 faizədək endirim elanlarında rəqəmlər və faiz işarəsi böyük formada yazılaraq önə çıxarılır, şəkilçilər isə daha kiçik formalarda qeyd edilir və bu, istehlakçıların aldadılmalarına gətirib çıxarır. Nəticədə bu cür reklam aksiyalar zamanı müştərilər zərər görürlər.
Ekspertlərin fikrincə, bu yolla müştəri cəlb etmək və satışları artırmaq mümkündür, lakin bu, yalnız qısamüddətli gəlir gətirə bilər.
Ticarət fırıldaqçılığı ilə qarşılaşan insanlar rəsmi olaraq İqtisadiyyat Nazirliyinə və ya Azad İstehlakçılar Birliyinə müraciət edə bilərlər.
