Paytaxtın Sabunçu rayonu Məştağa qəsəbəsində yerləşən 108 saylı məktəbin qarşısında piyada nişanları quraşdırılsa da, piyada zolağı təyin olunmayıb. Bu məktəblilərin həyatı üçün təhlükə yaradır. Bu barədə AZTV reportaj hazırlayıb.
Qeyd olunan yolda zolağın və işıqforun olmaması səbəbindən həmin yerdə bir neçə dəfə yol qəzaları baş vermişdir. Şagirdlərin dediyinə görə, hər dəfə yolu keçmək üçün yolda maşın qalmayana gədər gözləyirlər.
Bakı şəhər təhsil idarəsinin nümayəndəsi Afiq Əzizovun sözlərinə görə, belə bil məsələlər ilə bağlı araşdırmalar aparılır və sonra müvafiq dövlət qurumlarına müraciət göndərilir.
Mövcud vəziyyətlə bağlı Bakı nəqliyyat agentliyinin mətbuat xidmətinin rəhbəri Mais Ağayev isə bildirib ki, məktəblərin ətrafında eyni səviyyəli piyada keçidləri təşkil edilir - “Məktəb Yavaş” sözləri yazılır, sürət məhdudlaşdırıcı maneələr, yəni tramplinlər quraşdırılır, xüsusilə kənd və qəsəbələri əhatə etməklə, bir çox məktəblərin ətrafında sürət həddinin 30 km/saat həcmində endirilməsi ilə bağlı tədbirlər görülür və buna uyğun olaraq həmin məktəblərin ətrafında müvafiq nişanlanma həyata keçirilmişdir.
