Bakının 3 qəsəbəsində yeni içməli su sistemi yaradılır. Bu haqda bu gün, 15 aprel tarixində Bakuplus.az “Azərsu”ya istinadən xəbər verir.
Layihə Maştağa, Nardaran və Bilgəh qəsəbələrini əhatə edir. Su təchizatı Ceyranbatan sutəmizləyici qurğularından qidalanan Maştağa su anbarından aparılacaq. Bu məqsədlə anbarın nasos stansiyası yenidən qurulacaq.
Su nasoslar vasitəsilə Nardaran qəsəbəsində yeni inşa edilən 10.000 kubmetr tutumu olan anbara vurulacaq. Maştağa və Nardaran anbarını əlaqələndirmək üçün polad borularla 6 km uzunluğunda magistral su kəməri inşa edilir. Yaşayış massivlərinə suyun çatdırılması məqsədilə polad borularla 11 km uzunluğunda daşıyıcı magistral su kəmərləri çəkilir.
Ümumilikdə layihə çərçivəsində 25 km uzunluğunda magistral və paylayıcı su xətlərinin inşası nəzərdə tutulub. Artıq su xətlərinin tikintisi işlərinin 50%-i icra olunub. Tikinti-quraşdırma işlərinin cari ilin sonuna qədər başa çatdırılması nəzərdə tutulur. Yeni layihə 70.000-ə yaxın sakinin içməli su təchizatının yaxşılaşdırılmasına imkan verəcək.
