Paytaxtın Sabunçu rayonu, Maştağa qəsəbəsi, Mənsur Vəkilov küçəsi boyunca axan kanalizasiya suyu kanala axıdılır. Bununla yanaşı, yerli sakinlər su kanalının tullantılar üçün istifadə edilməsindən şikayətçidirlər. Bu haqda bu gün, 19 oktyabr tarixində Bakuplus.az Xəzər Xəbər-ə istinadən məlumat verir.
Ərazidə mərkəzləşdirilmiş kanalizasiya xətti mövcud deyil, bu səbəbdən kustar üsulla çəkilmiş xətlər birbaşa kanala çıxır.
Sakinlər aidiyyəti qurumlardan kanalizasiya boruları ilə təmin edilmə barədə dəfələrlə müraciət etsələr də, nəticəsi olmayıb.
Maştağa bələdiyyəsinin sədr müavini Ağanəcəf Qədirov qeyd edib ki, sözügedən problemdən xəbərdardırlar.
“Azərsu” ASC-dən isə bildirilib ki, ərazidə mərkəzləşmiş kanalizasiya infrastrukturunun gələcəkdə dövlət investisiyaları hesabına qurulması planlaşdırılır.
