Bakının Sabunçu rayonu, Maştağa qəsəbəsi, 108 nömrəli tam orta məktəbin qarşısında piyada keçidi zolağının olmaması sakinləri narahat edir. Bu haqda bu gün, 27 aprel tarixində Bakuplus.az Xəzər Xəbər-ə istinadən xəbər verir.
Sözügedən ərazidə yolun hər iki tərəfində piyada keçidi nişanı olsa da, müvafiq zolaq yoxdur. Bu səbəbdən sürücülər piyadalara yol vermirlər. Hər gün şagirdlər və həmin küçədə yaşayan sakinlər öz həyatlarını təhlükəyə atırlar.
Sakinlərin sözlərinə görə, sürücülərin sürətə diqqət etməmələrinə görə ardıcıl 3 gün məktəblilərin iştirakı ilə yol qəzaları baş verib.
“Bir neçə quruma müraciət etmişəm. Lakin heç bir məlumat ala bilmədim. Zolaq çəkilsə də, maksimum bir ay sonra ondan heç nə qalmır”, – deyə sakinlər şikayət edirlər.
Əlavə olaraq, fərdi və sərnişindaşıma fəaliyyəti ilə məşğul olan nəqliyyat vasitələri təhsil ocağının qarşısında saxlayır.
Dövlət Yol Polisindən (DYP) bildirilib ki, yolda zolaq olmasa, lakin piyada keçidi nişanı olsa, sakinlər yolu keçə bilərlər. Sürücülər isə nişana əməl edərək onlara yol verməlidirlər.
Azərbaycan Yerüstü Nəqliyyat Agentliyindən (AYNA) isə zolaqların mərhələli şəkildə yeniləndiyi qeyd edilib.
