Bakının Sabunçu rayonunun Maştağa qəsəbəsində sakinlər 8 ay işıqsız qaldıqlarını iddia edirlər. Bu haqda bu gün, 9 aprel tarixində Bakuplus.az ARB Media-ya istinadən xəbər verir.
Söhbət Müşəlan adlanan ərazidən, Rübabə Muradova küçəsindən gedir. Sakinlərin sözlərinə görə, onlar öz hesablarına tranformator üçün yer düzəldiblər, amma transformatorun özü yoxdur.
“Bir il bundan qabaq müraciət eləmişik, ərizəmiz də var. “Azərişıq” icazə verir, sadəcə olaraq Maştağa işıq idarəsi bizim işimizi ləngidir. İlin 8 ayını biz işıqsız oluruq”, - deyə sakinlər şikayət edirlər.
Əlavə olaraq, vətəndaşların digər problemi də yollardır. Onlar bildirirlər ki, yollar bərbad vəziyyətdədir. Bu da hərəkətə çətinliklər yaradır.
“Uşaqların məktəbə gedib-gəlməsi əziyyətdir. Bələdiyyənin əməkdaşları da bu yoldan istifadə edirlər, amma heç nə dəyişmir”, - deyə sakinlərdən biri qeyd edib.
Maştağa qəsəbə İcra nümayəndəsinin müavini Ramin Ağazadənin verdiyi məlumata görə, Azərbaycan Avtomobil Yolları Dövlət Agentliyinə (AAYDA) müraciət olunub. Dövlət investisiya proqramından vəsait ayrılsa, ərazinin asfaltlanması nəzərdə tutulub.
