Bakının Sabunçu rayonu, Maştağa qəsəbəsində su xətti çəkilib, amma iş yarımçıq qalıb. Bu haqda bu gün, 17 fevral tarixində Bakuplus.az ATV Show-ya istinadən xəbər verir.
Söhbət Axund Mirzə Əbdülkərim küçəsindən gedir. Ərazidə bir neçə ay öncə su xətti çəkilib, lakin sayğac quraşdırılmayıb. Sakinlərin sözlərinə görə, onlar uzun müddətdir ki, içməli suyun olmamasından əziyyət çəkirlər.
“Gəlib hamısını lazım olan kimi çəkiblər, qazıblar, sadəcə gəlib sayğacları 3 aydır quraşdırmırlar. Buna görə də biz ya suyu alırıq, ya da məktəbin həyətindən bidonlarla daşımağa məcbur oluruq”, – deyə sakinlər şikayət edirlər.
“Azərsu” ASC-nin mətbuat katibi Anar Cəbrayıllı bildirib ki, adıçəkilən ərazidə podratçı şirkət tərəfindən yeni su şəbəkəsi layihəsinin icrası hələ tam bitməyib.
“Hələ iki küçədə də işlər davam etdiriləcək və bundan sonra artıq xəttin yoxlanılması, təzyiqə davamlılığı, yuyulub, təmizlənib dezinfeksiya olunması işləri həyata keçiriləcək və ondan sonra artıq evlərə suyun verilməsinə başlanılacaq”, – deyə mətbuat katibi vurğulayıb.
