Bakının Maştağa qəsəbəsində yerləşən Siyavuş Aslan küçəsinin Mehdi Abbas küçəsi ilə kəsişmə nöqtəsində yağıntı nəticəsində böyük su gölməçəsi yaranıb və yollar yararsız hala düşüb. Bu haqda bu gün, 7 dekabr tarixində Bakuplus.az Real TV-yə istinadən məlumat verir.
Sakinlər deyirlər ki, buradan piyada keçmək, demək olar ki, qeyri-mümkündür. Əvvəllər avtomobillə hərəkət mümkün olsa da, indi bu da əlçatmaz olub. Baş yola çıxmaq üçün digər alternativ yol olmadığından sakinlər bu gölməçəni çətinliklə də olsa keçməyə məcburdurlar. İnsanlar qış aylarında qarlı yollardan keçmək üçün qaz borularının üstü ilə hərəkət etməyə məcbur qalırlar.
Sabunçu Rayon İcra Hakimiyyətinin (RİH) Maştağa inzibati ərazi dairəsi üzrə nümayəndəsi Şamil İbrahimli məsələyə aydınlıq gətirib: “Qeyd olunan küçələr Albalılıq yaşayış massivində yerləşir. Bu küçələrə asfalt örtüyünün vurulması ilə bağlı işlər aidiyyəti üzrə AAYDA tərəfindən Dövlət İnvestisiya Proqramları çərçivəsində icra olunur. Bununla bağlı RİH tərəfindən həmin agentliyə və Azərbaycan Respublikası Nazirlər Kabinetinə məktubla müraciət olunmuşdur. Şəhərin bütün rayonlarında olduğu kimi, Sabunçu rayonunda da asfalt örtüyünün vurulması, binaların həyətlərindəki məhəllədaxili ərazilərdə təmir işləri Bakı Şəhər İcra Hakimiyyəti tərəfindən, qalan prospekt və küçələr, o cümlədən qəsəbədaxili və məhəlləarası yollarda isə AAYDA tərəfindən həyata keçirilir”.
[caption id="attachment_82109" align="alignnone" width="640"]
Foto real tv rəsmi Youtube kanalı[/caption]
